خلط القريهاند مع السلوقي العربي

[راعي الصفرا]

بسم الله الرحمن الرحيم
اخواني الاعزاء هل يحبب خلط القريهاند مع السلوقي العربي ؟
وهل من نتائج مضمونه من هذا الخلط؟
وشكرا

[مهاجر الخلان]

بالنسبه عني يا اخووي العزيز راعي الصفرا انا املكـ قرياهند واملك عربي ولا جاء في بالك اني اشبي منهم ابد
لانا هذا يعتبر اخلط او تهجين ونا مايد ابد التهجين
والسلوقي العربي الاصيل حرام تخرب سلالته خاصتن لكان طيب
اما القرياهند مع قرياهند بيعطيك صواريخ قووويه وارجو اني افتدك

[][ رٍأعَـِي قمَـِرٍآن ][]

والله ماعمري خلطت ،،، لكن إن شاء الله يكون أحد الاعضاء قد جربها ويفيدك ،،،
:..:
:..:
:..:
تحياتي لك ،،،

[سلطان العوني]

والله ما عمري خلطت ولا اعرف احد جرب الخلط

لكن اتوقع واحد فقط اللي بيجي يملك مواصفات الام والاب

والله اعلم

[عاشق السلق]

تسلم اخوي راعي الصفرا على المضوع الطيب بنسبه للخلط انا مجرب والنتيجه اسبق عن الام والاب وانتج ناجح والتجربه زينه
وتقبل مروري

[راعي هدّاد]

اخوي راعي الصفرا..


انا عندي جروه اسمها نفاف عمرها سنه و4شهور مهجن الاب عربي ومن مركز السلق العربي والام قريهاوند من بريطانيا



والنتيجه..


طلع الانتاج اسبق من الابويه بفارق قوي..


آخر مره جربت سلقتي نفاف(المهجنه)


هديتها على ارنب وصاردت بعد ماكملت 500 متر لأني كنت هاد الارنب من بعيد..


ومن بعد ماهديتها..خليتها تركض ورا الموتر وانا امشي 40 وهي تمشي وراي


وعلى فكره السلق نفاف كنت موقفنها 5 شهور ماركضتها..


واجرو اني افدتك..

[ماوكلي]

اذا كان الاب قوي وسبوق والام كذالك مستحيل مايطلع شي من اليراوه قوي

[راعي ليل]

الاخوان ماقصر كفوا ووفوا.موضوع تشكر عليه....



تقبل مروري

[صياد الوعل]

الاخوان بالامارات لهم تجربه ممتازه بالموضوع و اي هاوي يفكر يجمع بين المواصفتين السبق و السد بالتهجين لكن بعض المتعصبين للسلوقي العربي و الحفاظ على نقاوة السلاله يعارضون بشده ...!!!

[راعي الهدبا99]

ودي افيدك لاكن ما قد خلطت ابدا ...]اليت الاخوان الي قد جربوا الخلط يعطونا التجربه كييف

[بوبرغش]

بسم الله الرحمن الرحيم
اخواني الاعزاء هل يحبب خلط القريهاند مع السلوقي العربي ؟
وهل من نتائج مضمونه من هذا الخلط؟
وشكرا

السلام عليكم ورحمة الله وبركاته


اخوي راعي الصفر احب اصبح وامسي عليك بالخير انشالله


وهذا اول رد لي في هذا المنتدى الجميل والقيم بمواضيعه ومعلقاته المفيده

بخصوص الخلط اناااا انصح بالخلط مليون في المية

ماسمعتو بالسلق الأفغاني اللي مايهدونه الى على أصطياد الفهود !!

ولو تراجعون معي ان السلقان العربي من وين جات

اهل الخبرة عارفين هالشي وفي انواع كثير من السلقان

لأن تخيلو معي عندكم ضيخ من نسل عربي وله بطولات كثيره وفيه سبق وفي مواصفات جميله جدآ من ناحية الشكل ومن ناحية السبق وجميع النواحي ومايخذ الى الاول في المهدات أو الاول او الثاني او الثالث بس ياخذ من الاوائل وعندك قريهاند قوية وماشاءلله لان القريهاند في القومة تروح وفي الخط تروح وفيها صملة غير طبيعيه ايش اللي يمنع من التشبي ؟؟؟

بتطلع القوة سم وصاروخ ضيخ له بطولات وله مهدات وله مدى ونفسه طويل في المهد وقريهاند من النوع الطيب يعني بيطلعون الجرى مايحتاج اقوى من ابوها وامهااا ليه ؟؟؟

لان قوة الابو والام في الجرى ولين تجي الجرى عليك انت بالباقي

من تدريب ومن تغذيه واهم شي اهم شي في السلقان هي تقربك للسلق

المدرب اشلون يتقرب من سلقانه !!

يعني عندك سلقه او سلق

وانت ماتجيهم ولا تشوفهم الى وقت المقناص وتجي تهدهم هل تعتقد ان بتاكل من صيدهم ماعتقد

مثال على كلامي:

عندي ضاريه والله يالربع ماجاكم الى الصدق اني وين ماروح تجي معي والله اني اربطها تفك الحبل وتروح واذا ربطتها بسلاسل تصير مثل العصفور ولو جيت طلعت للبر انها على يسار الموتر ماتباعد واذا تعبت تروح ورى لكن من تسمع صوتي واقل لهاااا يه يه ماشوفه الى على يساري ومن اقولها حو حو تجي قدام الموتر ونفسيتها للأكل مايحتاج وتمشي مع هرن الموتر اذا سرعت سرعت واذا خفت ادق لها هرن تجي جمبي وماشالله عليهاااا وتعالو شوفها وقت الصيد والله تطرد طرد الشر ولو في قاع حجرة تطرد ولو تتحفى رجيلها تصيد وتاكل من صيدها وتلاقيها عقب ماتصيد الارند وتمسكه تلاقي رجيلها متحفيه بس صادت !!

مره من المرات كان علينا برد برد واناااا نايم والله يالربع انها نايمه برى وانااا في المجلس كنت المزرعه وهي نايمه برى قدام الباب وماتحرك من ادخل قعدت وافتح الباب تقوم كأنه تقولي يله ومن امشي راحت عند شنطة الموتر واذا نمت تجلس هي وتنام والله يالربع يجيني الصبي يقعدني عشان اقنص ماتتحرك تقوم ترفع راسها تشوفه وترد تنام بس من تشوفوني تقوم سبحان الله انت ونفسيتك مع السلقان دلعهم يدلعونك مادلعهم والله مايلحقون لو مجوعهم شهور هذا مثال على نفسيتك للسلق وعن سابق تجربه


وعن الخلط يقولوك اسال مجرب ولا تسأل طبيب خذلك ضيخ من نسل معروف وقريهاند وشبها من الضيخ ايش اللي منع ياما شفنا سلقان من سلاله لكن وقت الفعل فشل في فشل

لكن خذ قوة بقوه وشوف النتيجه اكيد صاروخ لا محاله

والسموحه على الاطاله والربع ماعليهم قصور والسموحه زدت عليكم في الكلام لكن احترامكم فوق الراس

بس اندماجي للموضوع حمسني

واتمنى اني افدتك وافدت من يقرى

وماتشوفن شر

[الهاوي..]

ماقصر اخوي عاشق السلق واخوي راعي هدد واخوي الجديد المميز عاشق صوغان كفوا ووفوا...

تقبل مروري..



الهاوي..

[مبتدئ]

مداخله بسيطه اخوان شما ,, الكل اشوفه يقولك ذيخ عربي وقريهاوند - ليش مايكون ذيخ قريهاوند وسلقه عربي !!

[. { . آذكرك . } .]

عآشق صوغآن .. الله يبيض وجهك ..!!

وكلامك آعجبني وصحيح 100%100 وآنآ مجرب الاهتمآم بالسلقه .. وشفت مثل الي شفته ..!!


مشكور على الموضوع رآعي صفرآ ..!!

[ولد ال زايد]

انا من ناحيتي أقول لك لاتخرب النسل دائما امتلك السلالة الأصيلة والنقية

إما عربي أصيل أو قريهاوند أصيل

والخلط والتهجين له محامد ولاكن اضرارة المستقبلية أكبر


تقبل مروري

[خيال الجدعا]

ماقصرو الاخوان وانا ماايد الخلط لان بيكون لة مساوئة في المقناص اما مايتحمل الحرارة

او مايادي على الوجة المطلوب تسلم على الموضوع الطيب ياطيب

وامور كثيرة موفق بإذن الله ... لك مني أجمل تحية .

[مبتدئ]

والله ولا كأني موجود :(

[بوبرغش]

مداخله بسيطه اخوان شما ,, الكل اشوفه يقولك ذيخ عربي وقريهاوند - ليش مايكون ذيخ قريهاوند وسلقه عربي !!



مرحبا طويل العمر

السموحه منك قبل كل شي لاكن بغيت أقولك عن حاجه من بعد أذنك وأذن من يقرى

معروفه ان سلقة القريهاند أقوى من ذيخ القريهاند ليه لأن السلقه اخف بواجد من الذيخ القريهاند الضيخ من الممكن في القومه اول المهد تعينه مش مثل شده قومة السلقه الضيخ اثقل ومن مربي القريهاند تعينهم يفضلون السلقه لأنها اخاف في القومه والمدى

وبخصوص اخواني اللي يفضلون النسل العربي الاصيل بدون تهجين لو نرجع لين ورى تلاقون قبل مافي اصلآ شي اسمه سلق ولا سلقان كانت كلاب صيد ومذكور في القرآن الكريم كلاب صيد مش سلقان لكن بعد ظهور الاسلام اطلقو على كلاب الصيد اسم سلقان وكانت من اول هذي السلقان الافغانيه ثم تنازلت ووصلت الى تهجين وخرجت هالسلقان من اليمن في السودان لو نجي على سلقان الكتيوي بتحصلها اقوى واطول في المدى وشدة تحمل هذي السلقان اشد من تحمل سلقان دول الخليج لأنها سلقان حر يتحملون في الحر اكثر من اي موسم والنفس عندهم طويل هذا كلام اقوله من تجربه 20 سنة من تربية السلقان مش تسليه ولعبة وانتهت السالفه اللي يجرب بيعرف صحة كلامي جرب خلط عربي وجرب خلط مهجن وشوف النتيجه

اتكلم عن نفسي وبكل صراحه عندي نسل عرافهم من اول جد الى اخرهم من أيام جدي الله يرحمه وعادهم هالسلقان موجوده بدون اي تهجين ولا حاجه ومستحيل اخلطهم مع سلقان ثانيه ... لكن التغير حلو وفعلآ غيرت وشفت الفرق والتغير حلو والاكتشاف حلو ايش المشكله اذا الواحد جرب وشاف بعينه يحصل شي يمكن يكون احسن من غيره

لو ناخذ ضيخ صاروخ ومايحتاج وله بطولات في سرعته وفي كل حاجه وخذنى قريهاند بتعطي للجرى قوة لا توصف لان القريهاند في القومه لا يعلى عليهااا اول المسافه تخلطهم يعطيك شي خطير جدآ

مستحيل تخلط ويجيك فاشل تاخذ ضيخ وضاريه وتشبيهم وتجيك الأجرى ويطلعون فاشلين أنا أتحدى يطلعون فشل في فشل أهم شي اساهم اذا كان ضيخ ناجع وسبوق تعينه وقت المهد يطوي مثل الطير هو والقاع واحد وتعين الضاريه مايحتاج فيها سبق مب صاحي أخلط ترى الأجرى يطلعون اقوى من الاب والام بدون كلام وعليك بأول انتاج أول أجرى
وبعدين تخلط وتقط الاجرى وتهدهم واخر شي يطلعون فشل وتقول ان الخلط مافي فايده فيهم مايصير !!!

من يطلعون الأجرى خلاص بعد ثلاث شهور عقب مايتعلومن سلوكيات الاب والام اعزلهم وأنت وشغلك تغذيه ولياقه وخلاص اما تقطهم قط وتجي وتهدهم ومايركضون الى ركض سلحافه وتقول فشل طبيعي فشل وانت هاملهم مايجوز

اذا في تغذيه صحيحه
وفي لياقه صحيحه

خذ السبق

في سلقان عربيه من نسل طيب وتعينهم فشل في فشل لا شكل ولا زور ولا مدى ولا صدر عادي جدآ



انااا حبيت اعلق لأجل أنقل ماتعلمته من هذي التجارب كلهاااا

ولا اغير من كلام اخواني الكبار والعباقره المحترمين

تحياتي لكم اخواني

ودمت بكل ود وتقدير

[الشقاوي]

والله ماعمري خلطت ،،، لكن إن شاء الله يكون أحد الاعضاء قد جربها ويفيدك

مع تحياتي لك موفق بإذن الله ... لك مني أجمل تحية .

[الممهدون]

السلام عليكم ورحمة الله وبركاته

انا مجرب الخلط واقوى سلقان المخاليط ريس في بطنه مش طبيعي




وتقبل مروري

[راعي سنار]

الاخوان بالامارات لهم تجربه ممتازه بالموضوع و اي هاوي يفكر يجمع بين المواصفتين السبق و السد بالتهجين لكن بعض المتعصبين للسلوقي العربي و الحفاظ على نقاوة السلاله يعارضون بشده ...!!!

وانا مع ابو عبدالملك

[بواردي الشمال]

لا للتهجين